បរទេស ៖ សហរដ្ឋអាមេរិក និង សហភាពអឺរ៉ុបបាននិយាយថា «ពួកគេកំពុងសម្លឹងដាក់ទណ្ឌកម្មបន្ថែមទៀតលើអ៊ីរ៉ង់បន្ទាប់ពីការវាយប្រហាររបស់ខ្លួនលើអ៊ីស្រាអែលកាលពីចុងសប្តាហ៍»។
រដ្ឋមន្ត្រីក្រសួងរតនាគារអាមេរិក លោកស្រី Janet Yellen បាននិយាយថា លោកស្រីរំពឹងថានឹងចាត់វិធានការ «នៅប៉ុន្មានថ្ងៃខាងមុខ»ខណៈប្រធានគោលនយោបាយការបរទេសរបស់សហភាពអឺរ៉ុប (EU) លោក Josep Borrell បាននិយាយថា «ប្លុកនេះកំពុងធ្វើការលើវា»។
អ៊ីស្រាអែលបានជំរុញឱ្យសម្ព័ន្ធមិត្តរបស់ខ្លួនដាក់ទណ្ឌកម្មលើកម្មវិធីមីស៊ីលរបស់រដ្ឋាភិបាលក្រុងតេហេរ៉ង់។ ទណ្ឌកម្មរបស់អង្គការសហប្រជាជាតិលើកម្មវិធីនេះបានផុតកំណត់កាលពីខែតុលា។
ទណ្ឌកម្មទាំងនោះត្រូវបានផ្សារភ្ជាប់ទៅនឹងរឿងធំជាងនេះដើម្បីកម្រិតកម្មវិធីនុយក្លេអ៊ែររបស់អ៊ីរ៉ង់។ ទោះបីជាយ៉ាងណាក៏ដោយ ប្រទេសមួយចំនួន រួមទាំងសហរដ្ឋអាមេរិក សហភាពអឺរ៉ុប និងចក្រភពអង់គ្លេស បានរក្សាការដាក់ទណ្ឌកម្ម និងបន្ថែមទណ្ឌកម្មថ្មី។
អគ្គសេនាធិការយោធាអ៊ីស្រាអែល លោកឧត្តមសេនីយ៍ទោ Herzi Halevi បាននិយាយកាលពីថ្ងៃចន្ទថា«ការវាយប្រហាររបស់អ៊ីរ៉ង់នឹងមិនធ្វើឡើងដោយគ្មានការឆ្លើយតបនោះឡើយ»។
ការវាយប្រហារដោយផ្ទាល់ជាលើកដំបូងមិនធ្លាប់មានរបស់អ៊ីរ៉ង់លើអ៊ីស្រាអែលកាលពីថ្ងៃសៅរ៍បានឃើញរលកនៃការបាញ់មីស៊ីល និងដ្រូនជាង ៣០០ ពីប្រទេសអ៊ីរ៉ង់ អ៊ីរ៉ាក់ ស៊ីរី និងយេម៉ែន ដោយភាគច្រើនត្រូវបានទម្លាក់ដោយអ៊ីស្រាអែល និងសម្ព័ន្ធមិត្ត។
រដ្ឋាភិបាលក្រុងតេហេរ៉ង់បាននិយាយថា ការវាយប្រហារនេះគឺជាការសងសឹកចំពោះការវាយប្រហារតាមអាកាសដែលបានសន្មត់របស់អ៊ីស្រាអែលទៅលើស្ថានកុងស៊ុលរបស់ខ្លួននៅក្នុងប្រទេសស៊ីរីកាលពីថ្ងៃទី ១ ខែមេសាឆ្នាំ២០២៤ ដែលក្នុងនោះមនុស្ស ១៣ នាក់ត្រូវបានបាត់បង់ជីវិត ៕(ប្រែសម្រួលដោយ លោកសំណាង)
