បរទេស ៖ សហរដ្ឋអាមេរិកកាលពីថ្ងៃព្រហស្បតិ៍ ទី១៨ មេសា ឆ្នាំ២០២៤ បានបញ្ឈប់អង្គការសហប្រជាជាតិ(អ.ស.ប)ពីការទទួលស្គាល់រដ្ឋប៉ាឡេស្ទីន ដោយបោះវេតូនៅក្នុងក្រុមប្រឹក្សាសន្តិសុខ ដើម្បីបដិសេធរដ្ឋអំណាចប៉ាឡេស្ទីនជាសមាជិកពេញសិទ្ធិនៃស្ថាប័នពិភពលោក។
អាមេរិកបានវេតូលើសេចក្តីព្រាងសេចក្តីសម្រេចចិត្តដែលបានផ្តល់អនុសាសន៍ដល់មហាសន្និបាតអង្គការសហប្រជាជាតិដែលមានសមាជិកចំនួន ១៩៣ ប្រទេសថា «រដ្ឋប៉ាឡេស្ទីនត្រូវបានចូលជាសមាជិកអង្គការសហប្រជាជាតិ»។ អង់គ្លេស និងស្វីសបានអនុប្បវាទ ខណៈសមាជិកក្រុមប្រឹក្សាចំនួន ១២ ប្រទេសទៀតបានបោះឆ្នោតយល់ព្រម។
សហរដ្ឋអាមេរិកនិយាយថា «រដ្ឋប៉ាឡេស្ទីនឯករាជ្យមួយគួរតែត្រូវបានបង្កើតឡើងតាមរយៈការចរចាដោយផ្ទាល់រវាងអ៊ីស្រាអែល និងអាជ្ញាធរប៉ាឡេស្ទីន ហើយមិនមែនតាមរយៈសកម្មភាពរបស់អ.ស.បនោះទេ»។
លោក Robert Wood ឯកអគ្គរដ្ឋទូតរងរបស់អាមេរិកប្រចាំអ.ស.ប បានប្រាប់ក្រុមប្រឹក្សាសន្តិសុខថា«សហរដ្ឋអាមេរិកបន្តគាំទ្រយ៉ាងខ្លាំងចំពោះដំណោះស្រាយរដ្ឋពីរ។ ការបោះឆ្នោតនេះមិនឆ្លុះបញ្ចាំងពីការប្រឆាំងចំពោះភាពជារដ្ឋរបស់ប៉ាឡេស្ទីនទេ ប៉ុន្តែផ្ទុយទៅវិញគឺជាការទទួលស្គាល់ថាវានឹងកើតឡើងចេញពីការចរចាដោយផ្ទាល់រវាងភាគី»។
ប្រធានាធិបតីប៉ាឡេស្ទីន លោក Mahmoud Abbas បានថ្កោលទោសការវេតូរបស់សហរដ្ឋអាមេរិកថា «អយុត្តិធម៌គ្មានសីលធម៌ និងមិនសមហេតុផល»ដោយនិយាយក្នុងសេចក្តីថ្លែងការណ៍មួយថា ការវេតូនេះគឺជំទាស់នឹង «ឆន្ទៈរបស់សហគមន៍អន្តរជាតិ ដែលគាំទ្រយ៉ាងខ្លាំងដល់សមាជិកភាពពេញលេញរបស់ប៉ាឡេស្ទីន»។
ឯកអគ្គរដ្ឋទូតប៉ាឡេស្ទីនប្រចាំអ.ស.បលោក Riyad Mansour បានប្រាប់ក្រុមប្រឹក្សាបន្ទាប់ពីការបោះឆ្នោតថា«ការពិតដែលថាសេចក្តីសម្រេចចិត្តនេះមិនបានអនុម័ត នឹងមិនធ្វើឱ្យខូចឆន្ទៈរបស់យើងទេ ហើយវានឹងមិនធ្វើឱ្យខូចដល់ការប្តេជ្ញាចិត្តរបស់យើងទេ។ យើងនឹងមិនបញ្ឈប់នៅក្នុងកិច្ចខិតខំប្រឹងប្រែងរបស់យើងទេ»។
ការជំរុញរបស់ប៉ាឡេស្ទីនសម្រាប់សមាជិកភាពពេញលេញរបស់អង្គការសហប្រជាជាតិកើតឡើងក្នុងពេលសង្រ្គាមរវាងអ៊ីស្រាអែល និងក្រុមហាម៉ាសនៅហ្គាហ្សាបានកើតឡើងជាង៦ខែ និងខណៈដែលអ៊ីស្រាអែលកំពុងពង្រីកការតាំងទីលំនៅនៅតំបន់កាន់កាប់វេសប៊ែង ដែលអ.ស.បចាត់ទុកថាខុសច្បាប់៕(ប្រែសម្រួលដោយ លោកសំណាង)