បរទេស ៖ មន្ត្រីសុខាភិបាលប៉ាឡេស្ទីនបាននិយាយថា ទារិកាម្នាក់ត្រូវបានសម្រាលចេញពីផ្ទៃម្តាយជនជាតិប៉ាឡេស្ទីនម្នាក់ ដែលត្រូវបានសម្លាប់រួមជាមួយនឹងប្តី និងកូនស្រីរបស់នាងដោយការវាយប្រហាររបស់អ៊ីស្រាអែលនៅក្នុងទីក្រុង Rafah នៃតំបន់ហ្គាហ្សា ជាកន្លែងដែលមនុស្ស ១៩ នាក់បានស្លាប់ក្នុងពេលតែមួយយប់នៅក្នុងការវាយប្រហារកាន់តែខ្លាំងឡើង។
ពួកគេបាននិយាយថា អ្នកស្លាប់ក្នុងការវាយប្រហារលើផ្ទះចំនួនពីរនោះរួមមានកុមារ ១៣ នាក់មកពីមួយគ្រួសារ។
វេជ្ជបណ្ឌិត Mohammed Salama ដែលជាគ្រូពេទ្យថែទាំនាងតូច បាននិយាយថា ទារិកា ដែលមានទម្ងន់ ១,៤គីឡូក្រាមនិងត្រូវបានសម្រាលដោយវះកាត់បន្ទាន់នោះ មានភាពនឹងនរ និងល្អប្រសើរឡើងបន្តិចម្តងៗហើយ។ ម្តាយរបស់នាងឈ្មោះ Sabreen Al-Sakani មានផ្ទៃពោះ ៣០ សប្តាហ៍។
ទារិកានេះត្រូវបានគេដាក់ក្នុងកែវចិញ្ចឹមក្នុងមន្ទីរពេទ្យ Rafah រួមជាមួយទារកម្នាក់ទៀត ដោយមានពាក្យថា «ទារិកានៃទុក្ករបុគ្គល Sabreen Al-Sakani»ដែលសរសេរនៅលើស្កុតបិទលើទ្រូងរបស់នាង។
ពូរបស់នាងឈ្មោះ Rami Al-Sheikh បាននិយាយថា កូនស្រីពៅឈ្មោះ Malak របស់នាង Sakani ដែលត្រូវបានសម្លាប់នៅក្នុងការវាយប្រហារនោះ ចង់ដាក់ឈ្មោះប្អូនស្រីថ្មីរបស់នាងថា Rouh ដែលមានន័យថា«ដួងវិញ្ញាណជាភាសាអារ៉ាប់»។ លោកបានបន្តថា “«កុមារី Malak សប្បាយចិត្តដែលប្អូនស្រីរបស់នាងនឹងមកកាន់ពិភពលោក»។
វេជ្ជបណ្ឌិត Salama បាននិយាយថាទារិកានេះនឹងស្នាក់នៅក្នុងមន្ទីរពេទ្យរយៈពេល ៣ ទៅ ៤ សប្តាហ៍។ គាត់បាននិយាយថា ១បន្ទាប់ពីនោះ យើងនឹងដឹងថាក្មេងនេះនឹងចាកចេញទៅណា ទៅគ្រួសារ មីង ឬពូ ឬជីដូនជីតា។ នេះគឺជាសោកនាដកម្មដ៏ធំបំផុត ទោះបីជាកូននេះនៅរស់ក៏ដោយ ក៏នាងកើតមកជាក្មេងកំព្រា»៕(ប្រែសម្រួលដោយ លោកសំណាង)
