ថៃ ៖ ថៃបានចេញការព្រមានថ្មីអំពីអាកាសធាតុក្តៅខ្លាំងកាលពីថ្ងៃព្រហស្បតិ៍ ទី២៥ មេសា ឆ្នាំ២០២៤ ខណៈរដ្ឋាភិបាលបាននិយាយថា «រលកកម្តៅបានសម្លាប់មនុស្សយ៉ាងតិច ៣០ នាក់រួចហើយនៅឆ្នាំនេះ»។
អាជ្ញាធរទីក្រុងបាងកកបានផ្តល់ការព្រមានអំពីកម្តៅខ្លាំង ខណៈដែលសន្ទស្សន៍កម្តៅត្រូវបានរំពឹងថានឹងកើនឡើងលើសពី ៥២ អង្សាសេ។ សីតុណ្ហភាពនៅក្នុងរដ្ឋធានីថៃឡើងដល់៤០,១អង្សាសេកាលពីថ្ងៃពុធ ហើយកម្រិតស្រដៀងគ្នានេះត្រូវបានព្យាករណ៍សម្រាប់ថ្ងៃព្រហស្បតិ៍។
រលកអាកាសធាតុក្តៅខ្លាំងបានបោកបក់លើផ្នែកខ្លះនៃអាស៊ីខាងត្បូង និងអាស៊ីអាគ្នេយ៍ក្នុងសប្តាហ៍នេះ ដោយជំរុញឱ្យសាលារៀនទូទាំងប្រទេសហ្វីលីពីនផ្អាកថ្នាក់រៀន និងអ្នកគោរពបូជានៅប្រទេសបង់ក្លាដែសនាំគ្នាបួងសួងសុំទឹកភ្លៀង។
នាយកដ្ឋានបរិស្ថាននៃទីក្រុងបាងកកបានព្រមានថា សន្ទស្សន៍កម្តៅ ដែលជារង្វាស់ថាតើសីតុណ្ហភាពមានអារម្មណ៍បែបដោយគិតគូរពីសំណើម ល្បឿនខ្យល់ និងកត្តាផ្សេងទៀត គឺស្ថិតក្នុងកម្រិត «គ្រោះថ្នាក់ខ្លាំង» នៅក្នុងទីក្រុងបាងកក។
អាជ្ញាធរក្នុងខេត្ត Udon Thani នៅតំបន់ជនបទភាគឦសាននៃព្រះរាជាណាចក្រថៃ ក៏បានព្រមានអំពីសីតុណ្ហភាពក្តៅស្ទើរឆេះកាលពីថ្ងៃព្រហស្បតិ៍ផងដែរ។
ក្រសួងសុខាភិបាលបាននិយាយកាលពីល្ងាចថ្ងៃពុធថា«មនុស្ស ៣០ នាក់បានស្លាប់ដោយសារជំងឺគ្រុនក្តៅនៅចន្លោះថ្ងៃទី ១ ខែមករាដល់ថ្ងៃទី ១៧ ខែមេសាធៀបនឹង ៣៧ នាក់ក្នុងឆ្នាំ ២០២៣»។(ប្រែសម្រួលដោយ លោកសំណាង)
