បរទេស ៖ ប្រធានាធិបតីចិនលោក ស៊ី ជីនពីង កាលពីថ្ងៃសុក្រ ទី ២៦ ខែមេសា ឆ្នាំ២០២៤ បានប្រាប់អ្នកការទូតកំពូលអាមេរិកលោក អង់តូនី ប្លីងកិន ថាប្រទេសដែលមានសេដ្ឋកិច្ចធំបំផុតទាំងពីររបស់ពិភពលោកគួរតែជា «ដៃគូ មិនមែនជាគូប្រជែងទេ»ប៉ុន្តែថាមាន «បញ្ហាជាច្រើន»ដែលត្រូវដោះស្រាយនៅក្នុងទំនាក់ទំនងរបស់ពួកគេ។
លោកប្លីងកិន ស្ថិតនៅក្នុងប្រទេសចិនជាលើកទីពីរក្នុងរយៈពេលតិចជាងមួយឆ្នាំ បានជួបអ្នកនយោបាយចិននាំមុខគេនៅក្នុងរដ្ឋធានីប៉េកាំង ជាកន្លែងដែលក្រុមមន្ត្រីអាមេរិកបាននិយាយថា លោកនឹងលើកឡើងដោយផ្ទាល់នូវផ្នែកសំខាន់ៗនៃការខ្វែងគំនិតគ្នា រួមទាំង រុស្ស៊ី តៃវ៉ាន់ និង ពាណិជ្ជកម្ម។
ជំនួបជាមួយលោកប្លីងកិនក្នុងមហាសាលប្រជាជនទីក្រុងប៉េកាំង លោកស៊ីបាននិយាយថា ប្រទេសទាំងពីរបាន «ធ្វើឱ្យមានវឌ្ឍនភាពជាវិជ្ជមាន»ចាប់តាំងពីគាត់បានជួបជាមួយប្រធានាធិបតីអាមេរិក ចូ បៃដិន កាលពីឆ្នាំមុន ។ នេះបើយោងតាមការផ្សាយរបស់ទូរទស្សន៍រដ្ឋ CCTV ។
លោកស៊ីបាននិយាយថា «ប្រទេសទាំងពីរគួរតែជាដៃគូ មិនមែនជាគូប្រជែងនោះទេ»។ មេដឹកនាំចិនបានបន្ថែមថា«នៅតែមានបញ្ហាមួយចំនួនត្រូវដោះស្រាយ ហើយនៅតែមានកន្លែងសម្រាប់កិច្ចខិតខំប្រឹងប្រែងបន្ថែមទៀត»។
លោកបានបន្ថែមថា «យើងសង្ឃឹមថាសហរដ្ឋអាមេរិកក៏អាចមានទស្សនៈវិជ្ជមានអំពីការអភិវឌ្ឍរបស់ចិនផងដែរ។នៅពេលដែលបញ្ហាជាមូលដ្ឋាននេះត្រូវបានដោះស្រាយ … ទំនាក់ទំនងពិតជាអាចមានស្ថិរភាព កាន់តែប្រសើរឡើងនិងឆ្ពោះទៅមុខ»៕(ប្រែសម្រួលដោយ លោកសំណាង)