បរទេស ៖ រដ្ឋមន្ត្រីការបរទេសអាមេរិក លោក អង់តូនី ប្លីងកិន បាននិយាយនៅថ្ងៃពុធ ទី ១ ខែឧសភាឆ្នាំ២០២៤ថា«លោកនៅតែមិនទាន់ឃើញផែនការសម្រាប់ការវាយលុកដែលបានគ្រោងទុករបស់អ៊ីស្រាអែលលើទីក្រុង Rafah ភាគខាងត្បូងនៃតំបន់ហ្គាហ្សា នឹងការពារជនស៊ីវិលឡើយ» ,ដោយនិយាយឡើងវិញថារដ្ឋាភិបាលក្រុងវ៉ាស៊ីនតោនមិនអាចគាំទ្រការវាយលុកបែបនេះទេ»។
លោកប្លីងកិន និងនាយករដ្ឋមន្ត្រីអ៊ីស្រាអែល Benjamin Netanyahu បានជួបប្រជុំគ្នានៅទីក្រុងហ្សេរុយសាឡិមរយៈពេលពីរម៉ោងកន្លះ បន្ទាប់មកអ៊ីស្រាអែលបាននិយាយម្តងទៀតថា ប្រតិបត្តិការ Rafah នឹងបន្តទៅមុខ បើទោះបីជាមានជំហរពីសហរដ្ឋអាមេរិក និងការព្រមានរបស់អង្គការសហប្រជាជាតិថាវានឹងនាំឱ្យមាន «សោកនាដកម្ម»ក៏ដោយ។
លោកប្លីងកិនបានប្រាប់អ្នកយកព័ត៌មានថា «យើងមិនអាច នឹងមិនគាំទ្រដល់ប្រតិបត្តិការយោធាដ៏ធំនៅ Rafah ដោយអវត្តមានផែនការដ៏មានប្រសិទ្ធភាពដើម្បីធ្វើឱ្យប្រាកដថា ជនស៊ីវិលមិនមានគ្រោះថ្នាក់នោះទេ យើងមិនបានឃើញផែនការបែបនេះទេ»។
លោកបាននិយាយថា «មានវិធីផ្សេងទៀត ហើយនៅក្នុងការវិនិច្ឆ័យរបស់យើង វិធីល្អប្រសើរជាងនេះក្នុងការដោះស្រាយ…បញ្ហាប្រឈមដែលកំពុងបន្តរបស់ពួកហាម៉ាស គឺមិនតម្រូវឱ្យមានប្រតិបត្តិការយោធាដ៏ធំនៅ Rafah ទេ»,ដោយបន្ថែមថា «វាជាប្រធានបទនៃកិច្ចពិភាក្សាបន្តជាមួយមន្ត្រីអ៊ីស្រាអែល»។
អ្នកនាំពាក្យរដ្ឋាភិបាលអ៊ីស្រាអែលបាននិយាយថា អ៊ីស្រាអែលនៅតែប្តេជ្ញាចិត្តបំផ្លាញទម្រង់ប្រយុទ្ធរបស់ក្រុមហាម៉ាសដែលនៅសេសសល់។
អ្នកនាំពាក្យរូបនេះបានប្រាប់សន្និសីទកាសែតជាប្រចាំថា «នៅពេលនិយាយដល់ Rafah យើងប្តេជ្ញាកម្ទេចកងវរសេនាតូចហាម៉ាស់បួនក្រុមចុងក្រោយក្នុងចំណោមកងវរសេនាតូចទាំងប្រាំនៅ Rafah យើងកំពុងចែករំលែកផែនការរបស់យើងជាមួយរដ្ឋមន្ត្រីប្លីងកិន»។
អ៊ីស្រាអែលគឺជាកន្លែងឈប់សំចតចុងក្រោយក្នុងដំណើរទស្សនកិច្ចមកមជ្ឈិមបូព៌ារបស់អ្នកការទូតកំពូលរបស់អាមេរិកដែលជាដំណើរទស្សនកិច្ចលើកទីប្រាំពីររបស់គាត់ទៅកាន់តំបន់ដែលបានធ្លាក់ចូលទៅក្នុងជម្លោះកាលពីខែតុលាឆ្នាំមុន នៅពេលដែលក្រុមហាម៉ាស់បានវាយប្រហារភាគខាងត្បូងអ៊ីស្រាអែល។ ការវាយប្រហារនោះបានផ្តោតសំខាន់លើកិច្ចខិតខំប្រឹងប្រែងដើម្បីកែលម្អលក្ខខណ្ឌមនុស្សធម៌នៅក្នុងតំបន់ហ្គាហ្សា៕(ប្រែសម្រួលដោយ លោកសំណាង)
