បរទេស ៖ សហរដ្ឋអាមេរិកបាននិយាយថា ការចរចាស្តីពីបទឈប់បាញ់នៅតំបន់ហ្គាហ្សាគួរតែអាចបិទគម្លាតរវាងអ៊ីស្រាអែល និងក្រុមហាម៉ាស់ ខណៈកងកម្លាំងអ៊ីស្រាអែលបានដណ្តើមយកច្រកព្រំដែនសំខាន់ក្នុងទីក្រុង Rafah កាលពីថ្ងៃអង្គារ ទី៨ ឧសភាឆ្នាំ២០២៤នេះ ដោយបិទផ្លូវដ៏សំខាន់មួយសម្រាប់ជំនួយ។
និយាយទៅកាន់អ្នកសារព័ត៌មាននៅទីក្រុង Beirut មន្ត្រីហាម៉ាស់ លោក Osama Hamdan បានព្រមានថា«ប្រសិនបើការឈ្លានពានយោធារបស់អ៊ីស្រាអែលនៅតែបន្តនៅក្នុងទីក្រុង Rafah នោះវានឹងមិនមានកិច្ចព្រមព្រៀងបទឈប់បាញ់ឡើយ»។
ក្រុមសកម្មប្រយុទ្ធប៉ាឡេស្ទីននេះបានចោទប្រកាន់អ៊ីស្រាអែលថាបានធ្វើឱ្យខូចដល់កិច្ចខិតខំប្រឹងប្រែងបទឈប់បាញ់នៅក្នុងសង្គ្រាមរយៈពេលប្រាំពីរខែដែលបានបំផ្លាញកាហ្សា និងធ្វើឱ្យប្រជាជនរាប់សែននាក់គ្មានផ្ទះសម្បែង និងស្រេកឃ្លាន។
ការអត្ថាធិប្បាយអំពីបទឈប់បាញ់បានកើតឡើងនៅពេលដែលអ៊ីស្រាអែលបានលុកលុយទីក្រុង Rafah នៅភាគខាងត្បូង កន្លែងដែលជនស៊ីវិលប៉ាឡេស្ទីនជាងមួយលាននាក់បានភៀសខ្លួនដើម្បីស្វែងរកទីជម្រកពីការវាយលុករបស់អ៊ីស្រាអែលនៅទូទាំងទឹកដីដ៏តូចនេះ។
អ្នកនាំពាក្យសេតវិមាន លោក John Kirby បាននិយាយថា ក្រុមហាម៉ាស់បានផ្តល់ការកែប្រែកាលពីថ្ងៃចន្ទចំពោះសំណើរបស់អ៊ីស្រាអែល ក្នុងគោលបំណងបញ្ចប់ការជាប់គាំង។ អត្ថបទកិច្ចព្រមព្រៀង ដូចដែលបានធ្វើវិសោធនកម្មបានបង្ហាញថា ចន្លោះប្រហោងដែលនៅសេសសល់អាច «បិទជាដាច់ខាត»។ លោកបដិសេធមិនបញ្ជាក់ថាទាំងនោះជាអ្វីនោះទេ។
អ៊ីស្រាអែលកាលពីថ្ងៃចន្ទបាននិយាយថា «សំណើបីដំណាក់កាលដែលក្រុមហាម៉ាស់បានអនុម័តគឺមិនអាចទទួលយកបានទេ
លោក Kirby បាននិយាយថា អ្នកសម្រុះសម្រួលមកពីកាតា និងអេហ្ស៊ីប រួមជាមួយមន្ត្រីអាមេរិក និងអ៊ីស្រាអែល កំពុងជួបជុំគ្នានៅទីក្រុងគែរ។ ហាម៉ាស់បាននិយាយដោយឡែកពីគ្នាថា គណៈប្រតិភូរបស់ខ្លួនគឺនៅក្នុងទីក្រុងគែរផងដែរ៕(ប្រែសម្រួលដោយ លោកសំណាង)
